ምስ ቤት-ጽሕፈት ኢሚግሬሽን ዝህልወኩም ቈጸራ

ኣብ`ዚ ናይ ቃለ-መሕትት እዋን እዚ ከመይ ዝኣመሰሉ ሕቶታት እዮም ክቐርቡልኩም?

እዚ ምስ ቤት-ጽሕፈት ኢሚግሬሽን እተካይድዎ ቃለ-መሕትት ንነዊሕ ግዜ ዝጸንሕ ኣይኰነን። ብዛዕባ እቲ ኣብ ቤልጂዩም ዓለም-ለኻዊ ዕቝባ ንምርካብ መመልከቲ ከተቕርቡ ዝደረኸኩም ምኽንያት መብርሂ ክትህቡ ከድልየኩም እዩ።

ኣብ ቤት-ጽሕፈት ኢሚግሬሽን ዝሰርሕ ሓላፊ ሕቶታት ከቕርበልኩምን ንእትህብዎም መልስታት ኣብ ሰነድ ከስፍሮምን እዩ። ዝርርባዊ ተርጓሚ ክሕግዘኩም ስለዝዀነ፡ እቶም ዝቐርቡልኩም ሕቶታት ንዓኹም ብሩሃት እዮም ክዀኑ። ኣብ መወዳእታ፡ እቲ ኣብ ቤት-ጽሕፈት ኢሚግሬሽን ዝሰርሕ ሓላፊ ነቲ ዝጸሓፎ ሰነድ ደጊሙ ከንብበልኩምን ብዛዕባኡ ከምዝተሳማማዕኩም ንምርግጋጽ ኣብኡ ክታምኩም ንኸተንብሩ ክሓተኩምን እዩ። ቅዳሕ ናይ`ቲ ሰነድ እቲ ክወሃበኩም እዩ።

ድሕር ምክያድ ናይ`ዚ ቃለ-መሕትት እዚ ዝስዕብ እንታይ እዩ?

ቤት-ጽሕፈት ኢሚግሬሽን፡ እታ ነቲ ዓለም-ለኻዊ ዕቝባ ንምርካብ ዘቕረብኩሞ መመልከቲ ናይ ምምስራሕ/ምስላጥ ሓላፍነት እትስከም ሃገር ቤልጂዩም ምዃናን ዘይምዃናን ክፍትሽ እዩ። እታ ዝምልከታ ሃገር ቤልጂዩም እንተዀይና፡ ቤት-ጽሕፈት ኢሚግሬሽን ንጉዳይኩም ናብ ትካል CGVS/CGRA ከሰጋግሮ እዩ። ትካል CGVS/CGRA ድሒርኩም ንውሕ ዝበለ ቃለ-መሕትት ንኸተካይዱ ዕድመ ክገብረልኩም እዩ።