ካብ ትካል CPAS/OCMW ዝርከብ ማሕበራዊ ሓገዝ
ከም ዕቑባት ስደተኛታት ተቐባልነት እንተረኺብኩም እሞ ገዛ ክትካረዩሉ ኰነ ርእስኹም ክትክእልሉ እትኽእሉ ኣታዊ ዘይብልኩም ምስ እትዀኑ፡ ካብ ትካል CPAS/OCMW ሓገዝ ክትሓቱ ትኽእሉ ኢኹም።
ካብ ትካል CPAS/OCMW ማሕበራዊ ሓገዝ ክረክብ ዝኽእል ሰብ ከመይ ዝኣመሰለ እዩ?
ካብ ትካል CPAS/OCMWማሕበራዊ ሓገዝ ንምርካብ፡ ሓያለይ መምዘኒ ቅድመ-ኵነታት ከተማልኡ የድልየኩም።
- ብሕጋዊ መልክዕ ኣብ ቤልጂዩም እትነብሩ (ከም ዕቑባት ስደተኛታት ተቐባልነት ረኺብኩም፡ ኣብ ሳልሳይ ኣካል ዝምርኮስ ዕቝባ ተዋሂቡኩም ወዘተ) ክትኰኑ ይግባእ
- ስእነት ዘለኩምክትኰኑ ይግባእ። ትካል CPAS/OCMW ንኵነታትኩምን ደረጃ ኣታዊኹም ክግምግም እዩ።
- ኣብ ቤልጂዩም መንበሪ ቦታ ዘለኩም ክትኰኑ ይግባእ።
ትካል CPAS/OCMW ካልኦት መምዘኒታት እውን ኣብ ግምት ከእቱ ይኽእል እዩ፦ ኣብ ስራሕ ንኽትዋፈሩ ፍቓደኛታት ምዃንኩምን ዘይምዃንኩምን፡ ንዘለዉኹም ካልኦት ምንጭታት ሓገዝ ንኽትጥቀሙሎም ናብ ካልኦት ትካላት ቅድም ከተመልክቱ ወዘተ።
ትካል CPAS/OCMW ከመይ ዝኣመሰሉ ሓገዛት እዩ ዝገብር።
ትካል CPAS/OCMW እቲ ንዓኹም ዝሓይሽ ዓይነት ሓገዝ ኣየናይ ምዃኑ ይግምግም። ገለ ኣብነታት ናይ`ቶም ብትካል CPAS/OCMW ዝወሃቡ ሓገዛት፦
- ገንዘባዊ ሓገዝ (ወርሓዊ ደሞዝ መነባብሮ ፤ ካብ መጠን ደሞዝ መነባብሮ ዝውሕድ ኣታዊ ምስዝህልወኩም ድማ መመላእታ ገንዘብ)
- ምውሃብ መንበሪ ገዛ ወይ ድማ ሓገዝ ኣብ ምድላይ መንበሪ ገዛ
- ተወሳኺ ገንዘብ ናይ መትከሊ እግሪ ንብረት (መግዝኢ ኣቝሑን ንብረታትን ገዛ)
- ሓገዝ ኣብ ምሽፋን ወጻኢታት ሕክምና
- ሓገዝ ኣብ ምድላይ ስራሕ
- ሓገዝ ኣብ ምምላስ ዕዳ (መንጎኝነት ኣብ ጉዳይ ዕዳ)
- ማሕበረ-ስነ-ልቦናዊ ሓገዝ
ማሕበራዊ ሓገዝ ምስዘድልየኩም፡ ናብ ትካል CPAS/OCMW ናይ`ቲ ዘለኹሞ ምምሕዳር ከተማ ኪዱ።