ዕማማት ናይ ሕጋዊ መጕዚትኩም

ሕጋዊ መጕዚትካ ወሰንቲ ኣብ ዝዀነ ይኹን ዝተሓዘልካ ቈጸራ ይተሓጋገዘካ፤ ከምኡ`ውን ግቡእ ውሳኔ ክኽትወስድ ይድግፈካ።

• ሕጋዊ መጕዚትካ ኣብ እትነብረሉ ቦታ ብምምጻእ ክበጽሓካ እዩ (እንተወሓደ ሓንሳብ ኣብ ወርሒ)።
• ሕጋዊ መጕዚትካ ንዓኻ ኣብ ዝበጽሓሉ እዋን የዘራርበካን ንእተቕርበሉ ሕቶታት ክምልስ ይፍትንን። እዚ ድማ ብሓገዝ ናይ ዝርርባዊ ተርጓሚ እዩ ዝትግበር።
• ሕጋዊ መጕዚትካ ምስ ትካላት ኣገልግሎት ዕቝባ ኣብ ዝህልወካ ቈጸራታት ንዓኻ ኣሰንዩ ይኸይድ፤ (ቤት-ጽሕፈት ኢሚግሬሽን፡ CGVS/CGRA፡ RvV/CCE)።
• ሕጋዊ መጕዚትካ መንበሪ ቦታ ንምርካብ ኣብ እትገብሮ ጻዕሪ ይተሓጋገዘካ።
• ሕጋዊ መጕዚትካ ምስ ክኢላ ስነ-ሕጊ ማለት ምስ ጠበቓ የራኽበካ። ብሓባር ብምዃን ድማ ብዛዕባ መስርሕ ጉዳይካ ምኽሪ ይህቡኻ።
• ሕጋዊ መጕዚትካ ቤት-ትምህርቲ ኣብ ምርካብ ኰነ ኣብ ቤት-ትምህርቲ ኣብ ምምዝጋብ ይሕግዘካ።
• ሕጋዊ መጕዚትካ ኣብ ግዜ ሕማምካ ይሕግዘካ።
• ሕጋዊ መጕዚትካ፡ ስድራ-ቤትካ ኣብ ምርካብ ይሕግዘካ።

ንሕጋዊ መጕዚት ብዝምልከት ዝዀነ ይኹን ሕቶ ኣለካ ዶ?

ትካል ኣገልግሎት መጕዚትነት ሕጋዊ መጕዚትካ ግቡእ ስርሑ ይፍጽም ምህላዉን ዘይምህላዉን የረጋግጽ። ንዕማማት ናይ ሕጋዊ መጕዚትካ ብዝምልከት ገለ ሕቶ ምስዝህልወካ እውን ንትካል ኣገልግሎት መጕዚትነት ተወከስ ኢኻ።

ምስ ሕጋዊ መጕዚትካ ገለ ዘይምርድዳእ ኣጋጢሙካ ኣሎ ዶ? ብዛዕባ እቲ ዘሰሓሕበኩም ኵነታት ምስ ሕጋዊ መጕዚትካ ወይ ምስ ኣሳላጢ/ት ማሕበራዊ ጉዳያትካ ተዛራሪብካ ናይ ሓባር ፍታሕ ከተምጽእ ፈትን። ንዘጋጠመካ ግርጭት ባዕልኻ ክትፈትሖ ምስዘይትኽእል፡ ንትካል ኣገልግሎት መጕዚትነት ተወከስ ኢኻ።

ከቢድ ምስሕሓብ ኣብ ዘጋጥመሉ እዋን፡ ጉዳይካ ብፍርዳዊ መስርሕ ከምዝደቓቐስ ክግበር ተኽእሎ ኣሎ። ዳኛ፡ ትካል ኣገልግሎት መጕዚትነት ካልእ መጕዚት ከምዝምድበልካ ክገብር ይኽእል እዩ።