ኣብ መዕበያዊት ስድራ-ቤት ምጽጋዕ

እንዳ ስድራ፡ እቲ ዝበለጸ ህጻናት ክዓብዩሉ ዝግባእ ቦታ እዩ። መሰነይታ ከም ዘይብሉ ትሕቲ ዕድመ መንእሰይ መጠን፡ ኣብ መዕበያዊት ስድራ-ቤት ንኽትጽጋዕ ሕቶ ከተቕርብ እውን መሰል ኣለካ።

መዕበያዊት ስድራ-ቤት፡ ብግዚያውነት እተዕቍበካ ወይ እተጸግዓካ ስድራ-ቤት እያ። ይኹን'ምበር፡ መዕበያዊት ስድራ-ቤት ምሳኻ ድሮ ምትእሳስር ዝጸንሓ ስድራ-ቤት እውን ክትከውን ዝከኣል እዩ፤ ንኣብነት ድሮ ኣብ ቤልጂዩም ክነብሩ ዝጸንሑ እንዳ ሓትኖኻ/ኣሞኻ፡ ኣኮኻ/ሓወቦኻ፡ ሓውኻ።

እትቕመጠሉ ውሑስ ዝዀነ ቦታ ንኽትረክብ ክሕግዙኻ እዮም። ንዓኻ እትኸውን መዕበያዊት ስድራ-ቤት ምድላይ ቀሊል ጉዳይ ስለዘይኰነ፡ ኣብ ገሊኡ ነዊሕ ግዜ ክወስድ ይኽእል እዩ።

ምስ መዕበያዊት ስድራ-ቤት ተጸጊዕካ እተሕልፎ ህይወት ከመይ ይመስል?

• ምስ ሓደ ሰብ ወይ ምስ ስድራ-ቤት ምንባር ማለት እዩ
• ከም ናይ መዕበያ ወለዲ መጠን ሓላፍነት ይወስዱልካ፡ ብዛዕባ ዘጋጥመካ ዘበለ ጸገም ክትሕብሮም ትኽእል ኢኻ።
• ናብ ቤት-ትምህርቲ ትመላለስን ቋንቋ ተጽንዕን።
• ኣብ ንጥፈታት ናይ መዕበያዊት ስድራ-ቤትካ ትተሓጋገዝን ፈተውቲ ወይ ዓርከ-መሓዛ ተጥሪን።
• ሕጋዊ/ት መጕዚትካ ይ(ት)በጽሓካ።

ደሃይ ባዮሎጂካዊት ስድራ-ቤትካ ምርካብ

ምስ መዕበያዊት ስድራ-ቤት ብግዚያውነት መልክዕ ትቕመጥ እኳ እንተሃለኻ፡ ምስ ባዮሎጂካውያን ወለድኻ ንዝጸንሓካ ርክብ ክትበትኮ ኣለካ ማለት ኣይኰነን። ምስ መዕበያዊት ስድራ-ቤት እናተቐመጥካ ምስ ወለድኻ ንዝጸንሓካ ርክብ ክትቅጽሎ ትኽእል ኢኻ።

ወለድኻ ይኹኑ ካልኦት ኣባላት ስድራ-ቤትካ ኣበይ ከምዘለዉ ዘይትፈልጥን ደሃዮም ክትረክብ እትደልን እንተ ደኣ ኴንካ፡ ደሃይ ወለድኻ ወይ ካልኦት ኣባላት ስድራ-ቤትካ ንኽትረክብ ብመዕበያዊት ስድራ-ቤትካ ወይ ሕጋዊ/ት መጕዚትካ ክትሕገዝ ኢኻ።